ફિલમની ચિલમ.... મે ૧૮, ૨૦૧૪

શૂટિંગ  દરમિયાન અકસ્માત આફત કે અવસર?

શું ઇરફાન ખાન રિતિક રોશન કરતાં વધુ બિઝનેસ લાવી શકે? હા, જો ૨૦૧૪ના વર્ષમાં અમેરિકામાં થયેલા હિન્દી ફિલ્મોના વેપારને ગણત્રીમાં લો તો! એક અહેવાલ પ્રમાણે તો ઇરફાનની ‘લંચ બૉક્સ’નો યુ.એસ. ખાતેનો વકરો રિતિકની ‘અગ્નિપથ’ અથવા ‘ક્રિશ -૩’ કરતાં વધુ છે. નાની અર્થપૂર્ણ અને લીકથી હટીને બનતી ફિલ્મોના ચાહકો માટે આનાથી મોટા સમાચાર શું હોઇ શકે? (ગોળધાણા વહેંચો!) એક સમયે અમોલ પાલેકર કે ફારૂક શેખ જેવા અભિનેતાઓની ‘રજનીગંધા’ અને ‘ચશ્મે બદ્દદુર’ સરખી ફિલ્મો સફળ થતી ત્યારે મધ્યમમાર્ગી દર્શકોને થતું કે ક્યારે આ કલાકારોને પણ (ઇન્ટરનેશનલ ફેસ્ટિવલ્સ સિવાયના) ખરેખરા ઑડિયન્સનો લાભ મળશે? પણ ભલું થજો મલ્ટિપ્લેક્સ થિયેટર્સનું અને સાથે આવેલી કોર્પોરેટ ભાગીદારી કે એ દિવસો તો ક્યારના આવી ગયા અને ગ્લોબલ માર્કેટમાં ઇરફાન ખાન પણ એક લોકપ્રિય અભિનેતા તરીકે બોક્સ ઓફિસે પોતાનું કાઠું કાઢી શકે છે. 

 

બોક્સ ઓફિસે ગયા થોડા દિવસોમાં નવી ફિલ્મોના જે હાલ કર્યા છે તે જોતાં મોટાં પિક્ચરો ચૂંટણીનો માહૌલ પત્યા પછી જ મેદાનમાં આવશે. એટલે આ સપ્તાહે પણ નાના બજેટનાં પિક્ચરની લાઇન લાગેલી છે. આ વીકમાં ‘યે હૈ બકરાપુર’, ‘મસ્તરામ’, ‘મંજુનાથ’ અને ‘હવા હવાઇ’ જેવી ઓછી પબ્લિસીટીવાળી અને મહદ અંશે અજાણ્યા કલાકારોને લઈને બનેલી ફિલ્મો આવી છે. એ બધાની વચ્ચે ‘ટુ સ્ટેટ્સ’ ૧૦૦ કરોડનો આંકડો પાર કરી ગઈ એ મોટા ન્યુઝ હતા. પરંતુ, આ વીકમાં તેનાથી પણ મોટા સમાચાર હીરો અર્જુન કપૂરના પિતાજી બોની કપૂરને નડેલા અકસ્માતના હતા. આમ તો બોની સહી સલામત છે; પણ ઇન્ડસ્ટ્રીમાં શરૂઆતમાં આવેલા ન્યુઝ સનસનાટીભર્યા હતા. જે રીતે ટ્રેક્ટર સાથે અથડાઇને કારના બૉનેટ સહિતનો લોચો થઈ ગયો હતો (જેને ઑટો ઇન્શ્યુરન્સની ભાષામાં ‘ટોટલ લૉસ’ કહેવાય!)  તે જોતાં બોની કપૂર બચી ગયા એ ચમત્કારથી કમ નહતું. પણ અકસ્માતના એક અન્ય સમાચાર જ્યારે આવ્યા, ત્યારે મોટાભાગના સમજ્યા કે આ ‘એક વિલન’ ફિલ્મની પબ્લિસીટી માટે વહેતી મૂકાયેલી તસ્વીર હશે. કેમ કે તેમાં શ્રધ્ધા કપૂરે ચાકુ માર્યાથી લોહી લુહાણ થયેલા એક જુનિયર આર્ટિસ્ટનો ફોટો હતો! 

હકીકતમાં શ્રધ્ધાએ બનાવટી ચપ્પુથી હુમલો કરવાનો હતો. પરંતુ, કોઇ કારણસર તેને સાચું ચપ્પુ અપાઇ ગયું હતું અને પરિણામે બિચારા જુનિયર આર્ટિસ્ટને વાગી ગયું. (જો કે પછી ખુલાસો થયો છે કે એ શ્રધ્ધાને ડરાવવાનું યુનિટનું એક આયોજિત તોફાન હતું!) પણ સેટ પર થતા સાચા અકસ્માતની વાત આવે ત્યારે ‘કુલી’માં ફાઇટના શૂટીંગ દરમિયાન વિલન પુનિત ઇસ્સારના હાથે સાચ્ચો મૂક્કો વાગી જતાં અમિતાભ બચ્ચનને થયેલી જીવલેણ ઇજા સૌથી પહેલી યાદ આવે. અમિતાભ દિવસો સુધી જીવન-મરણ વચ્ચે ઝૂલ્યા હતા. પરંતુ, ફિલ્મ રિલીઝ થઈ, ત્યારે એ અકસ્માતને પણ આકર્ષણ બનાવાઇ હતી! પિક્ચરમાં એ ફાઇટ આવે ત્યારે રીતસર એ સીનને અટકાવીને ‘હાઇલાઇટ’ કરાયો હતો. બલ્કે ત્યાં લખાયું હતું કે આ મુક્કા વખતે અમિતાભ બચ્ચન ઘવાયા હતા. એ અગાઉ ‘દો આંખેં બારહ હાથ’ના શૂટીંગ દરમિયાન વ્હી.શાંતારામને પણ અકસ્માત થયો હતો અને તેનો લાભ તેમણે તે પછીની ફિલ્મમાં લીધો હતો.

શાંતારામજી તેમની સુપર ડુપર ફિલ્મ ‘નવરંગ’ની શરૂઆતમાં પડદા ઉપર જાતે આવીને કહે છે કે ‘દો આંખેં બારહ હાથ’ના શૂટીંગ વખતે બળદ સાથેની તેમની લડાઇમાં શીંગડાં વાગવાથી તેમની આંખો ઘવાઇ હતી. તેમને તે સમય દરમિયાન દેખાયેલા જીવનના  રંગોની વાર્તા પ્રસ્તુત છે... ‘નવરંગ’! તો આજના સ્ટાર સંજય દત્તનાં માતા-પિતા સુનિલ દત્ત અને નરગીસ ‘મધર ઇન્ડિયા’ના શૂટીંગ વખતે બનાવટીને બદલે લાગેલી સાચી આગના અકસ્માત પછી જ પરણ્યાં હતાંને? એ આગની જ્વાળાઓ ચારે તરફથી નરગીસને ઘેરી વળી હતી અને પુત્ર ‘બિરજુ’ બનેલા સુનિલદત્ત જાનની પરવા કર્યા વગર એ આગમાં કૂદી પડ્યા હતા. એટલું જ નહીં પોતે દઝાયા પણ લાખો ચાહકોની પ્રિય અભિનેત્રી નરગીસને બચાવી લાવ્યા હતા. નરગીસે જાણે એ આગમાં રાજકપૂર સાથેના સંબંધોને કાયમ માટે હોમી દીધા હોય એમ ‘મિસીસ દત્ત’ તરીકે આખી જિંદગી એક સન્માનીય નારીની જેમ રહ્યાં એ હિન્દી સિનેમાના કલાકારોની ગરિમા (ડિગ્નિટી)ના ઇતિહાસનું એક ઉજ્જવળ પાનું છે. 

પોતાને બચાવતાં દાઝેલા સુનિલ દત્ત સાથે દવાખાનામાં નરગીસ

તો લલિતા પવારને શૂટીંગ દરમિયાન ભગવાનદાદાના હાથે સાચો તમાચો વાગી જતાં એક આંખ કાયમ માટે ખોડવાળી રહી ગઈ હતી. એ ક્રેડિટ લલિતા પવારને કે એ ત્રાસ આપનારી સાસુના રોલ કરતી વખતે એ ઝીણી થતી આંખનો ઉપયોગ એવો સરસ કરે કે ઑડિયન્સ તેમને પેટભરીને ગાળો આપે. પરંતુ, ક્યારેક પડદા પરની દુશ્મનાવટ અસલી જિંદગીમાં આવી જાય તો સાચો ગોળીબાર પણ થઈ જાય, જેવું તામિલ સુપર સ્ટાર એમ.જી રામચંદ્રન સાથે બન્યું હતું. તેમની ફિલ્મમાં ખલનાયક બનતા એમ. આર. રાધાએ વરસો પહેલાં વિધાનસભાની ચૂંટણી વખતે, ‘એમ. જી. આર.’ને ગળામાં ગોળી મારીને પછી પોતાના પર પણ ગોળીબાર કર્યો હતો. સદનસીબે નાયક અને ખલનાયક બન્ને બચી ગયા. વિલનને અદાલતે જેલની સજા પણ કરી. એમ.જી.આર. તે વખતે જંગી બહુમતિથી જીત્યા અને ડીએમકેને પ્રથમવાર સત્તા મળી હતી. ’૬૭ના એ ઇલેક્શન પછી હોસ્પિટલના પલંગમાં ગળે પાટો બાંધીને બેઠેલા એમ.જી.આર.નો ચૂંટણી જીત્યાના કાગળોમાં સહી કરતો ફોટો હજી યાદ છે. તે વર્ષે મળેલી સત્તાનો જ વારસો કરૂણાનિધિ અને જયલલિતા વારાફરતી અત્યાર સુધી સંભાળે છે.

એટલે ‘એક વિલન’ના સેટ પર થઈ એવી અકસ્માતની ઘટનાઓ ક્યારેક વ્યક્તિનો ઇતિહાસ પલટી નાખતો અવસર સાબિત થઈ શકતી હોય છે. ત્યારે આજે એવા ‘એક વિલન’ની સ્મૃતિને સંભારવાની છે, જેમનું તાજેતરમાં અવસાન થયું અને શાહરૂખે ટ્વીટ કરીને દુનિયાને જાણ ન કરી હોત તો સુધીરના દેહાંતની કોઇને ખબર પણ ના પડત. સુધીરને ‘દીવાર’માં બુટપોલીશ કરાવ્યા પછી ફેંકીને પૈસા આપતા ‘જયચંદ’ તરીકે અથવા તો ‘સત્તે પે સત્તા’ના સાત પૈકીના એક ભાઇની ભૂમિકામાં કે પછી ‘ખોટે સિક્કે’ના તેમના રોલ માટે યાદ કરનારા ઘણા હશે. પરંતુ, કાવ્ય પ્રેમીઓના હૈયામાં તો સુધીર મુકેશનું એક સરસ ગાયન “મુઝે રાત દિન યે ખયાલ હૈ, વો નજર સે મુઝકો ગિરા ન દે....” (ઉમર કૈદ) અને ફિલ્મ ‘હકીકત’માંની કૈફી આઝમીની રચના “મૈં યે સોચકર ઉસકે દર સે ઉઠા થા કિ વો રોક લેગી મના લેગી મુઝકો...”  ગાનાર કલાકાર તરીકે હમેશાં અમર રહેશે; જેની અંતિમ પંક્તિ આમ છે.... “યહાં તક કિ ઉસ સે જુદા હો ગયા મૈં... જુદા હો ગયા મૈં....જુદા હો ગયા”!

              

તિખારો!

જ્યારથી આલિયા ભટ્ટે ‘કૉફી વીથ કરણ’માં ભારતના રાષ્ટ્રપતિ તરીકે પૃથ્વીરાજ ચવાણ (મહારાષ્ટ્રના મુખ્યમંત્રી)નું નામ કહ્યું છે, ત્યારથી તેના માટે ટ્વીટર પર જાત જાતની રમૂજ ચાલી રહી છે.  એક  જ સૅમ્પલ.....

“આલિયાએ કપાળમાં લિપસ્ટિક કેમ લગાવી છે?”

“કારણ કે કોઇએ તેને સલાહ આપી છે કે ‘મેકઅપ યૉર માઇન્ડ’!!”