ફિલમની ચિલમ.... ૧0 મે ૨૦૧૫

સલમાનખાનને સજા

અને સામે આવ્યો ફિલ્મ ઉદ્યોગનો વરવો ચહેરો!

એક બાજુ અક્ષયકુમારની નવી ફિલ્મ ‘ગબ્બર ઇઝ બૅક’ને પહેલા  દિવસે સાડા તેર કરોડ રૂપિયાનો વકરો થતાં એ ૨૦૧૫નું સૌથી સારો ઓપનિંગ દિવસ સાબિત થયો. એટલું જ નહીં, પ્રથમ સપ્તાહમાં ૫૫ કરોડનો બિઝનેસ આપ્યાના સારા સમાચાર આવ્યા. પણ દુષ્કાળમાં અમીવર્ષા જેવી લાંબા સમયે આવેલી આ મોટી સફળતાનો આનંદ ફિલ્મો સાથે સંકળાયેલા સૌ થઈ શકે તે પહેલાં, બીજી તરફ  છઠ્ઠી મેએ સલમાનખાનને પાંચ વરસની જેલની સજા થઈ અને માહૌલ બદલાઇ ગયો. પરંતુ,  ‘ભાઇ’ને સારું લગાડવા મેદાને પડેલા હિન્દી સિનેમાના કેટલાક કલાકારોના વાહિયાત પ્રત્યાઘાતોને કારણે ફિલ્મ કલાકારોનો વરવો ચહેરો સામે આવતો હોય એવી સાર્વત્રિક લાગણી થઈ. બીજું બધું તો ઠીક, પણ અભિજીતના એક જ બિનસંવેદનશીલ ટ્વીટને લીધે આખી ફિલ્મ ઇન્ડસ્ટ્રીને શરમાવું પડ્યું. 

અભિજીતે ફિલ્મી સ્ટાઇલમા લખી દીધું કે “કુત્તા રોડ પે સોયેગા તો કુત્તે કી મૌત મરેગા...” સલમાનની ગાડી નીચે કચડાઇ જનાર એક વ્યક્તિના મોત પર દુઃખ વ્યક્ત કરવાનું તો દૂર રહ્યું; પણ ઉપરથી લખ્યું કે “રોડ ગરીબ કે બાપ કા નહીં હૈ”! મીડિયામાં લોકોનો આક્રોશ જોતાં પોતાનાથી થઈ ગયેલી એ કોમેન્ટ બદલ દિલગીરી વ્યક્ત કરીને મામલો ઠંડો પાડવાને બદલે અભિજીતે ચેનલો પર ખુલાસા કરવા આવવાની મુર્ખામી કરી; ત્યારે તો ફિલ્મના કલાકારો માટેની રહી-સહી ઇજ્જત પણ દાવ પર લાગી ગઈ.

અભિજીત જેવા એકાદા કલાકારને કારણે આખી ઇન્ડસ્ટ્રીનું નામ બદનામ ના થાય એ સાચું. વળી, એ પણ ખરું કે અભિજીત અગાઉ એક કરતાં વધુ વિવાદોમાં ચમકી ચૂક્યા છે.  પરંતુ, બીજા કલાકારોએ પણ સલમાનને અદાલતે કરેલી સજા બદલ દુઃખ જ વ્યકત કર્યું, એ કેવું? જ્યારે કોર્ટમાં કેસ ચાલ્યો હોય, બન્ને પક્ષના સાક્ષી-પુરાવા રજૂ થયા હોય અને ન્યાયાધીશે ચુકાદો આપ્યો હોય ત્યારે પણ ‘‘ભાઇ બહોત અચ્છે ઇન્સાન હૈં...” એમ કહીને થયેલી સજા બદલ માતમ મનાવનારાઓ પણ અભિજીતની સોફિસ્ટિકેટેડ આવૃત્તિ જ કહેવાય. આ કેસ તેર વરસ સુધી ખેંચાયો તેને લીધે સલમાનને નુકશાન થયું એમ કહેતાં સોની રાઝદાન(મિસિસ મહેશ ભટ્ટ) જેવાંએ જાણકારી મેળવવી જોઇએ કે આ વિલંબ સરકારી વકીલને કારણે થયો હતો કે પછી સલમાનની લિગલ ટીમ દ્વારા? જે સિસ્ટમનો લાભ લઈને કેસ થાય એટલો મોડો ચલાવાય અને પછી એ જ ન્યાય પ્રથાને ભાંડવાની?

તો અર્જુન કપૂરે પણ પોતાના ટ્વીટમાં લખ્યું કે “કોઇને કે કોઇપણ અદાલતને જે કહેવું હોય એ કહે તે (સલમાન) આવી સજા ડિઝર્વ કરતા નથી”! કોર્ટને કે તેના ચુકાદાને વચ્ચે લાવ્યા વગર પોતાની લાગણી વ્યક્ત કરી શકાય એ નહીં જાણતા અર્જુન કપૂરનું નસીબ સારું હતું કે અભિજીત જાતે આગળ આવ્યા હતા અને બધે તેમની માફકસરની ધુલાઇ થતી હતી; તેથી કોઇ ચેનલે અર્જુનનો ખુલાસો ના પૂછ્યો. નહીંતર, અભિજીતની જેમ કદાચ માફી માગવાનો વારો આવત.

ચુકાદાને કારણે ‘ભાઇ’ અને તેમના પરિવાર પર આવી પડેલી આપત્તિના સમયમાં પોતે તેમની પડખે ઉભા હોવાનું તાત્કાલિક ચુકાદાના દિવસે જ જાહેર કરનારાઓમાં અર્જુન ઉપરાંત સોનાક્ષી સિન્હા, પરિણિતિ ચોપ્રા, આલિયા ભટ્ટ, વરૂણ ધવન, સિધ્ધાર્થ મલ્હોત્રા, રીતેશ દેશમુખ, આયુષ્યમાન ખુરાના, સોફી ચૌધરી, સાજીદ ખાન, સોહા અલી ખાન જેવા નવી પેઢીના કલાકારો વધારે પ્રમાણમાં હતા. એ સૌને આશા કે આજે નહીંને કાલે એક કોર્ટ નહીંને બીજી અદાલતમાંથી સલમાન જામીન પર બહાર આવી જશે. ત્યારે તેની ‘ગુડબુક’માં રહેલું કામ લાગી શકશે.

પણ એ બધામાંથી કોઇની ટ્વીટમાં પેલા મૃત્યુ પામેલા એક કે ઘવાયેલા ચાર ગરીબ મજૂરો માટે સહાનુભૂતિનો એક શબ્દ પણ જોવા ના મળ્યો! ઉપરથી ‘એ લોકો રોડ પર સૂતા કેમ?’, ‘સરકારે તેમને રહેવા માટે ઘર આપી ના શકી એ પણ જવાબદાર છે’ જેવી વાહિયાત દલીલો કરીને ઘા પર મીઠું ભભરાવવાનું કામ કર્યું. તો વળી, કેટલાક અતિ ઉત્સાહીઓએ અભિજીતની ટ્વીટનો વિચાર વિસ્તાર કરતા હોય એવા પ્રત્યાઘાતો આપ્યા. કોઇ કહે રાજકારણીઓને સજા નથી થતી અને દાઉદ જેવાને કાયદો પકડી નથી શકતો; જ્યારે કોર્ટના શરણે આવેલા બચાડા સલમાનને જેલવાસ? એ વાંચીએ કે સાંભળીએ ત્યારે સલમાનના પિતા સલીમખાન અને જાવેદ અખ્તરે મળીને લખેલી બેમિસાલ ફિલ્મ ‘દીવાર’માં અમિતાભ બચ્ચનના મુખે બોલાયેલો પેલો યાદગાર ડાયલોગ યાદ આવે.... ‘જાઓ પેહલે ઉસ આદમી કા સાઇન લેકર આઓ, જિસને મેરે બાપ સે સાઇન લિયા થા, જાઓ પહલે ઉસ આદમી કા સાઇન લેકર આઓ જિસને મેરી માં કો...’ એ યાદી પૂરી થતાં જ થિયેટર તાળીઓથી ગુંજી ઉઠતું. 

પરંતુ, તેનો પ્રત્યુત્તર કેટલાને યાદ હશે? ભ્રષ્ટ રાજકારણીઓ કે અન્ય લોકો કાયદાથી છટકી જાય છે એવી દલીલ કરાનારાઓના જવાબમાં શશિકપૂર જે ચોટદાર સંવાદ કહેતા એ જ કહેવાનું મન થાય છે, ‘દુસરોં કે ગુનાહ ગિનાને સે તુમ ખુદ બેગુનાહ નહીં હો જાતે’! ફિલ્મો સાથે સંકળાયેલા સૌને ‘બિચારા સલમાન’ની ઇમેજ રજૂ કરવી જ ગમે. કારણ કે તેની ફિલ્મો પાછળ રોકાયેલા અને ખાસ તો એ પિક્ચરો ૧૦૦ કરોડની કમાણી કરવાની ગેરંટી વાળી હોઇ કરોડો રૂપિયા સલવાવાનો ભય હોય. અત્યારે સલમાનની ‘બજરંગી ભાઇજાન’ અને ‘પ્રેમ રતન પાયો’ એ બે ફિલ્મો નિર્માણાધિન છે.અગાઉ સંજયદત્તના કારાવાસના કિસ્સામાં સિનેમા ઉદ્યોગ આ પરિસ્થિતિમાંથી પસાર થઈ ચૂક્યો છે. હકીકતમાં તો સલમાનને વધારે નુકશાન તેમની લીગલ ટીમે જે એક પછી એક નવી થિયરીઓ કોર્ટ સમક્ષ મૂકી તેનાથી થયું. ઠેઠ બાર વરસે પોતાનો ફેમિલી ડ્ર્રાયવર અશોક સિંગ ગાડી ચલાવતો હતો એમ કહીને કદાચ મુશ્કેલી ઓર વધારી હતી. જો ડ્રાયવર જ કાર ચલાવતો હતો અને તેનાથી જ અકસ્માત થયો હતો, તો પહેલા જ દિવસે પોલિસને કેમ ના કહી દીધું?

આટલાં વરસ સુધી અદાલતોના સમય તથા નાણાંનો વ્યય શા માટે કરાવ્યો? એક વ્યક્તિ આરોપી હોય ત્યાં સુધી બધા શકનો લાભ મળે. પરંતુ, કોર્ટે દોષિત માનીને ગુનેગાર (કન્વીક્ટ) ઠરાવ્યા પછી પણ  ચુકાદાના પ્રત્યાઘાતમાં ફિલ્મ ઉદ્યોગમાંથી કોઇની એ કહેવાની હિંમત નહતી કે કોર્ટે માન્યું છે કે ‘ભાઇ’એ વગર લાયસન્સે ગાડી ચલાવી હતી. તેમણે શરાબના નશામાં ગાડી ચલાવી હતી. મરનાર તેની ઉપર ક્રેઇન પડવાથી નહીં પણ સ્પીડમાં આવીને પગથિયાં તોડીને ચઢી ગયેલી ગાડી નીચે કચડાઇને મરી ગયો હતો અને ગાડી સલમાન પોતે જ ચલાવતા હતા ડ્રાયવર નહીં; તેથી ‘ભાઇ’નો કેસ આપણા સૌ માટે આંખ ઉઘાડનારો છે. તેને બદલે લોકોને ફુટપાથ કે રોડ પર સુવું પડે એવી સ્થિતિ બદલ સરકાર ઉપર છાણાં થાપવાનાં? એવી દલીલ કરનારાઓને જવાબ આપતાં કોઇએ સોશ્યલ મીડિયા પર સરસ લખ્યું છે. એ કહે છે કે દાખલા તરીકે તમારા ઘરમાં પંખો ફીટ કરાવવા ઇલેક્ટ્રિશ્યનને બોલાવો, જેની પાસે લાયસન્સ ન હોય અને તે શરાબના નશામાં ગમે તેમ પંખો બેસાડીને જાય. થોડા વખત પછી એ પંખો તૂટી પડે અને તમને ઇજા થાય તો તમે કોને દોષ દેશો? પેલા દારૂડીયા અણઘડ ઇલેક્ટ્રિશ્યનને કે પછી તમારા પિતાજીને; જેમણે તમને એ.સી. નહતું નખાવી આપ્યું? સોચો ઠાકુર!

(લખ્યા તારીખ મે ૦૭, ૨૦૧૫)

તિખારો!
 

‘ભૈયાજી, ભેલ બનને મેં અભી ઔર કિતની દેર લગેગી?’
 

‘ટાઇમ તો લગેગા સાહબ.... યે ભેલ હૈ.... અદાલત સે મિલનેવાલી બેલ નહીં હૈ!” 

ફિલમની ચિલમ..... મે ૦૩, ૨૦૧૫

 

ટીવીના રિયાલિટી શો જેવી

હવે  સ્ટીંગ ઓપરેશન આધારિત ‘રિયાલિટી ફિલ્મ’?

સેન્સર બોર્ડનો એક નવો જ રેકોર્ડ થઈ રહ્યો છે..... આ સપ્તાહે પહેલી મેના દિવસે રિલીઝ થનારી ફિલ્મ ‘સબ કી બજેગી બૅન્ડ’ને તો સેન્સરે પાસ કરી છે, પરંતુ, તેના ટ્રેઇલરને મંજૂર કરવાનો ઇનકાર કરી દીધો છે. મતલબ એ કે પ્રેક્ષકોને અઢી-ત્રણ કલાકની આખી ફિલ્મ જોવા દેવામાં વાંધો નહીં; પણ બે-પાંચ મિનિટના તેના ટૂકડા જોવા હાનિકારક છે! આ કોયડાનો ઉકેલ કરતાં સેન્સર બોર્ડના ચીફ પહલાજ નિહલાનીએ ચોખવટ કરી છે કે પિક્ચર સેન્સર બોર્ડની અગાઉની ટીમે મંજૂર કરેલી છે; જ્યારે ટ્રેઇલર અમારી પાસે આવ્યું જેને પ્રમાણપત્ર આપવા જેવું નથી. જાણકારોની માહિતી પ્રમાણે આ ફિલ્મ વલ્ગર અને ડબલ મિનિંગ ડાયલોગવાળી છે. એટલે કોઇ તેના વિરુદ્ધ અદાલતમાં જઈને સ્ટે ઓર્ડર ન લાવે ત્યાં સુધી તે રિલીઝ થઈ જ શકશે. પરંતુ, ફિલ્મના સર્જકોનો દાવો જુદો છે.

 

‘સબ કી બજેગી બૅન્ડ’નું ડાયરેક્શન કરનાર અનિરુધ્ધ ચાવલા એક આર.જે. છે અને ગયા વર્ષે તેમણે પોતાના ફાર્મહાઉસ પર એક પાર્ટી યોજી હતી. તેમાં છુપા કેમેરા રાખીને એ પાર્ટીમાં હાજર સેલીબ્રીટીઝના વાણી અને વર્તનને તેમને કેદ કરાવી લીધાં હતાં. એ સ્ટિંગ ફુટેજની જાણ જ્યારે  પાર્ટીમાં હાજર રહેલા એક્ટરો અને એક્ટ્રેસો સહિતના સૌને થઈ ત્યારે તે સામે કેસ કરવાની તૈયારી થઈ હતી. એટલું જ નહીં, ફિલ્મ રિલીઝ કરવાના આ દિવસોમાં અનિરુધ્ધે લખેલા એક જાહેર પત્ર અનુસાર તેમણે પોતે એ ફુટેજ રિલીઝ નહીં કરવા એક લીગલ ડોક્યુમેન્ટ સાઇન કર્યું હતું. પરંતુ, હવે એ જ ફુટેજ પરથી ફિલ્મ બનાવીને રજૂ કરાઇ રહી છે, જેમાં સેલીબ્રીટીઝનાં નામો બદલવામાં આવ્યાં છે. ત્યારે પેલા કાનૂની દસ્તાવેજના આધારે કોઇ પગલું લઈ શકાય એમ હોય તો પણ કોણ જાહેરમાં આવીને કહે કે પિક્ચરમાંની આ મારી વાત છે?

 

ટૂંકમાં, અત્યારે તો ફિલ્મને એક વિવાદાસ્પદ મટિરિયલને કારણે એડવાન્સ પબ્લિસિટી મળી ગઈ છે. સામાન્ય રીતે આવી ફિલ્મો ક્યારે આવી અને ક્યારે જતી રહી એ પણ કોઇ ધ્યાનમાં લેતું હોતું નથી. તેથી આ સુરસુરીયા જેવો વિવાદ હવે બોક્સ ઓફિસ પર કેવો ફરક લાવે છે એ જોવા જેવું હશે. કેમ કે આ ‘રિયાલિટી ફિલ્મ’ તરીકે પ્રચારિત થયેલી ફિલ્મમાં કોઇ ખાસ સ્ટાર્સ નથી.... સિવાય કે અમન વર્મા અને સ્વરા ભાસ્કરને તમે સ્ટારની કેટેગરીમાં મૂકતા હો. (સ્વરા ભાસ્કરની ટેલેન્ટ જો તમે ‘લિસન અમાયા’ કે ‘રાંઝણા’માં જોઇ હોય તો આવું પિક્ચર કેમ કર્યું હશે એવો સવાલ થાય!) ફિલ્મનું ટ્રેઇલર યુ ટ્યુબ પર જુઓ તો એ મધુર ભંડારકરની બહુ ચર્ચિત ‘પેજ થ્રી’ની નવી ‘રોસ્ટ એડિશન’ (આવૃત્તિ) હોવાનો શક જાય. યાદ છે ને ‘ એઆઇબી નૉકાઆઉટ રોસ્ટ’? તે પબ્લિક શોમાં કરણ જોહર, રણવીર સિંગ અને અર્જુન કપૂરે કરેલી ડબલ મિનિંગ કોમેડીને કારણે હજી થોડાક મહિના પહેલાં જ હાહાકાર હતો. હવે એ ચકચાર શાંત પડ્યો છે અને કરણ જોહર પોતાના અભિનયવાળી ‘બૉમ્બે વેલ્વેટ’ના પ્રચારમાં લાગ્યા છે.

કરણ જોહર પોતે જે રિયાલિટી શો ‘ઇન્ડિયાસ ગૉટ ટૅલેન્ટ’માં જજ છે, તેમાં ‘બૉમ્બે વેલ્વેટ’ના હીરો-હીરોઇન રણબીર કપૂર અને અનુષ્કા શર્માને પ્રચાર માટે લાવ્યા, ત્યારે ઘરના ભૂવા અને ઘરના જાગરીયા જેવો ઘાટ હતો. મઝાની વાત એ હતી કે કરણ સાથે એ કોમ્પિટિશનને જજ કરનાર સાથી ન્યાયાધીશો(!) મલઈકા અરોરા અને કિરણ ખેર પણ રણબીર સાથે સેલ્ફી લેતાં હતા. રણબીરની અત્યારે ચર્ચાતી પ્રેમ કહાનીની એ અસર હશે કે શું? દરમિયાન રણબીર અને પિતા રીશી કપૂર વચ્ચેના મતભેદોને મિટાવવા ‘મહારાણી જોધાબાઇ’એ ખુલ્લા મીડિયા મેદાનમાં ઝંપલાવ્યું છે. આ સપ્તાહે રણબીરનાં મમ્મી નીતુ કપૂરે ઇન્સ્ટાગ્રામ પર પોતાનો રીશી કપૂર સાથેનો એક જૂનો ફોટો મૂકીને તેના ઉપર આ સુવાક્ય લખ્યું છે, “એક સુખી લગ્ન એ સારા માફી આપનારા બે જણનું મિલન હોય છે!!!” અને પછી કૌંસમાં લખ્યું છે “આ આપણી લગ્નતિથિ નથી”)

નીતુજીના આ જાહેર સંદેશાનું અર્થઘટન શું હોઇ શકે? મોટાભાગનાઓએ અંદાજ મૂક્યો છે કે રણબીર અને કટરિના નવેમ્બરમાં લગ્ન કરવાના છે એવા વહેતા થયેલા સમાચારના સંદર્ભે માતાએ દીકરા અને સંભવિત પુત્રવધુને સફળ લગ્નની રેસીપી આપી છે. પરંતુ, અમને શક જુદો છે. રણબીર અને કટરિનાએ આપેલા જમણવારમાં હાજરી આપવા બદલ નીતુથી જહાંપનાહ નારાજ થયા લાગે છે. તો જ એ પોતાના રોમાન્સના જૂના દિવસોની યાદ જેવો ફોટો જાહેરમાં મૂકે અને “આ આપણી લગ્નતિથિ નથી” જેવા શબ્દો લખે. સોશ્યલ મીડિયાના આવ્યા પછી આ સગવડ સરસ થઈ છે. અગાઉ આવા પ્રસંગે પોતાના વિશ્વાસુ પત્રકારને આખી સ્ટોરી કહેવાની અને એ ‘કપૂર પરિવારનાં અંતરંગ વર્તુળોમાંથી મળતી માહિતી પ્રમાણે રીશી અને નીતુના સંબંધોમાં ખટાશ આવી ગઈ છે’ જેવું કશુંક ગોળ ગોળ લખાય. વળી, એ મેગેઝીન છપાઇને બહાર પંદર દહાડે કે મહિને. ત્યાં સુધીમાં ભલું હોય તો આખો મામલો થાળે પડી ગયો હોય કે પૂરો વણસી ચૂક્યો હોય!

જ્યારે આજે તો નીતુમા પોતાના સ્માર્ટ ફોનમાંથી કે કોમ્પ્યુટર દ્વારા ટ્વિટર કે ઇન્સ્ટાગ્રામ જેવા માધ્યમ મારફત પોતાની લાગણી (કે માફી) ઇસી મિનિટે જાહેરમાં વ્યક્ત કરી શકે છે. આ મામલે રીશી ફરિયાદ કરી શકે એમ પણ નથી. કારણ કે પોતાનો દીકરો કહ્યામાં નથી એવી જાહેરાત તેમણે જ પહેલી કરી હતી. (વારા પછી વારો, તારા પછી મારો!) રીશીને અસલી જિંદગીમાં હજી પિતાની ભૂમિકા કરતાં તકલીફ પડી રહી છે, ત્યારે આવનારા એક પિક્ચરમાં તે ‘દાદાજી’ બની રહ્યા છે. એ પિક્ચરનું નામ પણ કેવું સિમ્બોલિક છે? ‘કપૂર એન્ડ સન્સ’! એ ફિલ્મ કરણ જોહરના ‘ધર્મા પ્રોડક્શન’ના બેનર નીચે બની રહી છે અને તેમાં રીશીદાદાની ઉંમર હશે, ૯૦ વર્ષના વૃદ્ધની. એટલે જેમ આર. બાલ્કીના દિગ્દર્શનમાં બનેલી ‘પા’ માટે અમિતાભને કલાકો સુધી મેક અપ કરવા બેસવું પડતું હતું એ રીતે કદાચ રીશી કપૂરને પણ સમય ફાળવવો પડશે.

અમિતાભ સાથેની આર. બાલ્કીની છેલ્લી આવેલી ફિલ્મ ‘શમિતાભ’ને બોક્સ ઓફિસ પર ‘ચીની કમ’ જેવો પણ આવકાર નથી મળ્યો. છતાં એક સર્જક તરીકેની તેમની પ્રતિષ્ઠા હજી પણ એવી જ અકબંધ છે. તેમની નવી રોમેન્ટિક-કોમેડી માટે અર્જૂન કપૂરને સાઇન કરીને બાલ્કીએ સૌને આશ્ચર્યમાં નાખી દીધા છે. એ જ રીતે તેમની ‘ચીની કમ’ની હીરોઇન તબુને સાઇન કરવા આતૂર રોહિત શેટ્ટી પણ આજકાલ ચર્ચામાં છે. સૌ જાણે છે એમ, રોહિત આજકાલ ‘કરણ અર્જુન’ની રિમેક બનાવવાના પ્લાન કરી રહ્યા છે. તેમણે રાખીએ કરેલા યાદગાર રોલ માટે તબુ ઉપર પસંદગી ઉતારી છે. જો તબુ સંમત થશે તો, મિમિક્રી કરનારી મહિલા કલાકારોથી બચવા, કમ સે કમ આ એક ડાયલોગ તો તેમણે રાખી કરતાં અલગ રીતે બોલવો જ પડશે.... “મેરે કરન-અર્જુન આયેંગે...”!

તિખારો!

કટરિના કૈફ ગમ્મતો માટે બહુ જાણીતી નથી. પરંતુ, હમણાં તેણે કહ્યું કે “હું ડિનર કે લંચ માટે રેસ્ટોરાં જેવી જાહેર જગ્યાએ જવાનું હોય તો પણ ઉંઘમાંથી ઉઠીને આવતી હોઉં એમ જીન્સ- ટીશર્ટ પહેરીને પહોંચી જાઉં છું. જ્યારે સોનમ કપૂર ગમે ત્યાં મળે એ કાયમ કોઇ એવોર્ડ ફંક્શનની રેડ કાર્પેટ પર ચાલવા આવી હોય એવી તૈયાર થઈને આવતી હોય છે!”