ફિલમની ચિલમ..... ૧૫ ડીસેમ્બર. ૨૦૧૩

 

 

“શહરમેં બેવકૂફોં કી કમી નહીં હૈ!”

જેમ જેમ ‘ધૂમ થ્રી’ની રિલીઝ ડેટ ૨૦મી ડીસેમ્બર નજીક આવતી જાય છે, તેમ તેમ તેના વિશેના ગુંચવાડા વધતા જાય છે. અગાઉ અહીં લખ્યા મુજબ, ટિકિટના ભાવમાં ધરખમ વધારાનાં પડઘમ ઑલરેડી સંભળાવા માંડ્યાં છે. શું મુંબઈ-બેંગ્લોર જેવાં મૅટ્રો સિટીનું ઑડિયન્સ એક વ્યક્તિના ૫૦૦ રૂપિયા ચૂકવવા તૈયાર હશે? નાનાં શહેરોનાં મલ્ટિપ્લૅક્સ પણ લગભગ ડબલ પ્રાઇસ કરે એવી અપેક્ષા છે. ત્યારે એક સવાલ થાય કે આ સિનેમા સર્જકો પ્રેક્ષકોની દયા ખાતાં કદી શીખશે ખરા? અગાઉનાં વર્ષોમાં ‘મુગલ-એ-આઝમ’ જેવી એ સમયની સૌથી મોંઘી બનેલી કૃતિ આવી ત્યારે પણ ભાવમાં વધારો નહતો થયો. હા, ઓછી ટિકિટો અને વધારે પ્રેક્ષકોના ડિમાન્ડ-સપ્લાયના તફાવતને કારણે શરૂઆતમાં પિક્ચર જોનારાઓને બ્લૅકના ભાવ જરૂર આપવા પડતા. પરંતુ, સામાન્ય પ્રેક્ષકને લાઇનમાં ઉભા રહીને, ધક્કા-મુક્કી અને લાલાના ડંડા ખાઇને પણ રેગ્યુલર ભાવની ટિકિટ મળી શકતી જરૂર. આજે તો સિનેમાની ટિકિટોના કાળાબજારને કેન્દ્રમાં રાખીને બનેલી દેવ આનંદની ફિલ્મ ‘કાલાબાજાર’નો એક ડાયલોગ યાદ આવે છે.

‘કાલાબાજાર’માં ‘મધર ઇન્ડિયા’ના પ્રિમિયરની રાત્રે દોઢ રૂપિયાની ટિકિટના દસ રૂપિયા (ડેઢ કા દસ)નો ભાવ દેવ આનંદ પાડવા માંગતો હોય છે. તે વખતે તેની ગૅંગનો એક સાથી કહે છે કે લોકો નહીં ખર્ચે અને લાઈનમાં ઉભા રહીને ખરીદેલી ટિકિટો પડી રહેશે. તે વખતે દેવ આનંદ કહે છે, “ઇસ શહરમેં બેવકૂફોં કી કમી નહીં હૈ!” અને તેની બધી ટિકિટો વેચાઈ પણ જાય છે. શું ‘ધૂમ થ્રી’ના ભાવ-તાલ નક્કી કરતી વખતે તેના નિર્માતા તેમજ ડિસ્ટ્ર્રીબ્યુટર પણ તેમના તથા આમીર, અભિષેક અને કટરિનાના વફાદાર ચાહકોને ‘બેવકુફ’ ગણશે? (એક્ટરોના ભાવ કરોડોમાં ચૂકવાય કે આઈમેક્સમાં રજૂઆત કરાય કે પછી એક ગાયન પાછળ ચાર-પાંચ કરોડ ખર્ચાય એ બધો ભાર ઓડિયન્સ નામની કન્યાની કેડ પર જ આવે છે!) 

‘ધૂમ-થ્રી’ના પ્રચારમાંથી અભિષેકને સાઈડલાઇન કર્યાની ચર્ચા અહી થોડાંક સપ્તાહ અગાઉ કરી ત્યારે ઘણાને એ ધુમ્રસેર લાગી હતી. પરંતુ, પિક્ચર રજૂ થવાની તારીખ નજીક આવતી જાય છે, એમ એ ધુમાડાની આગ દેખા દેવા માંડી છે. અભિષેકને જ્યારે એમ પૂછાયું કે ‘ધૂમ થ્રી’ના મ્યુઝિક લૉન્ચ વખતે તે હાજર કેમ નહતો રહ્યો? ત્યારે તેણે કહ્યું કે તેને તો એ પ્રોગ્રામની ખબર જ નહતી! દેખીતી રીતે જ, ‘યશરાજ’માં પૅનિક બટન દબાય. એટલે આ સપ્તાહે આદિત્ય ચોપ્રાએ અભિષેકને ત્યાં જઈ ખુલાસા કર્યાના અહેવાલ આવે છે. પરંતુ, ચોપ્રા કૅમ્પે ફિલ્મની રજૂઆત પછીનો ‘ડર’ રાખવો પડશે. ‘ડર’ યાદ છે ને? તેમાં સની દેવલ કરતાં વિલન કહી શકાય એવા શાહરૂખને જ સૌથી વધુ હાઇલાઈટ કરાતાં સનીએ કાયમ માટે કીટ્ટા કરેલી છે. એવી કીટ્ટા અજય દેવગનને પણ થયેલી જ છે ને? ‘જબ તક હૈ જાન’ અને ‘સન ઓફ સરદાર’ વખતે થયેલી ટસલ હાઈકોર્ટ સુધી ગઈ હતી, એ હજી ગયા નવેમ્બર-ડીસેમ્બરની જ વાત છે.

જ્યારે આ ડીસેમ્બરમાં આવેલી સૈફઅલી અને સોનાક્ષી સિન્હાની ‘બુલેટ રાજા’ના જે હાલ બૉક્સ ઑફીસ પર થયા છે એ જોતાં તેમાંથી કશું પોઝીટીવ શોધી શકાય એમ નહતું. છતાં જુઓ લોકો કેવા કેવા રેકોર્ડ કાઢી બતાવે છે. તે મુજબ તો સૈફની આ સાલ છેલ્લે આવેલી ફિલ્મ ‘ગો ગોઆ ગૉન’નું પહેલા વીકનું કલેક્શન ૧૯ કરોડ હતું અને ‘બુલેટ રાજા’ એ લગભગ ૩૫ કરોડ લાવતાં એ આંકડાથી ડબ્બલ વકરો લાવનારી ફિલ્મ થઈ છે. પરંતુ, કોઇ એ યાદ નથી કરાવતું કે સૈફની જ ૨૦૧૩ની ‘રેસ ટુ’ના પહેલા વીકના ૭૬ કરોડ કરતાં આ અડધી જ રકમ છે. ટૂંકમાં, દિલ કો બહલાને કો ગાલીબ ખયાલ અચ્છા હૈ!

જ્યારે ‘બુલેટ રાજા’ પછીના શુક્રવારે આવેલી ‘આર.... રાજકુમાર’માં પણ નાયિકા સોનાક્ષી જ છે. તેને સતત બે અઠવાડિયાં બે જુદી જુદી ફિલ્મો માટે પબ્લિસિટી અને પ્રમોશન એવું અઘરું પડી ગયું કે ઘર-પરિવાર પણ બાજુ પર થઈ ગયાં હતાં. ક્યારેક એવો વિચાર પણ આવે છે કે પબ્લિસિટીના ભાગરૂપે હીરો સાથે પ્રેમ પ્રકરણ ચગાવવાની જૂની ટ્રીક અપનાવવાની હોત તો સોનાક્ષીનું શું થાત? એક વીકમાં સૈફ સાથે કેવી હરે ફરે છે, તેના રિપોર્ટ વહેતા કરવાના અને બીજા જ અઠવાડિયે શાહીદ કપૂર જોડે રંગરેલીયાં મનાવવાની અફવાઓ બજારમાં છોડવાની થાય!

સોનાક્ષીના પપ્પા શત્રુઘનસિન્હાનો જન્મદિન ૯મી ડીસેમ્બરે અને તેની ઉજવણીની પાર્ટીમાં દીકરી જ ટાઇમસર ના પહોંચી શકી. જો કે કોઇએ વાંધો લીધો હોત તો કરોડો કમાતી દીકરીના ડેડી અને લેટલતીફી ખુદ જાણીતા એવા શત્રુ ભૈયાએ ‘ખામોશ’ની ત્રાડ પાડી હોત! શત્રુ ભૈયાની ૬૮મી વર્ષગાંઠના દિવસે જ રમતવીર મેરી કૉમની આત્મકથા ‘અનબ્રેકેબલ’ના લોકાર્પણ અમિતાભે ફરી એક વાર પોતાની નમ્રતા બતાવી. તેમણે કહ્યું કે મેરી કૉમની બાજુમાં ઉભા રહીને પોતે ગૌરવ અનુભવે છે. એ જ મેરી કોમની જીવનકથા પરથી બનતી ફિલ્મમાં પ્રિયંકા ચોપ્રા મુખ્ય ભૂમિકા ભજવે છે. તો એ કેમ એ સમારંભમાં ઉપસ્થિત નહીં રહી હોય? શું દિગ્દર્શક ઉમંગ કુમાર અને નિર્માતા સંજય લીલા ભણશાળી વચ્ચે ક્રિયેટિવ મતભેદોને કારણે એ એ પિક્ચર વિલંબમાં પડ્યાની વાતો સાચી હશે?

તિખારો!

‘બીગ બૉસ’માં સલમાને ગૌહર ખાનને તેની ઉંમર પૂછી અને તેણે આંખનો પલકારોય માર્યા વગર નિર્દોષ ચહેરે ‘૨૯ વર્ષ’ કહી. ત્યારે બીગ બૉસના હાઉસમાં તેના ‘ખાસ મિત્ર’ કુશાલના પ્રપોઝલનું શું થશે? ગૌહરને ૨૮ વરસના કુશાલે કહ્યું હતું કે “આઇ વૉન્ટ ટુ ગ્રો ઓલ્ડ વીથ યુ”. પરંતુ, વિકીપિડિયામાં  ગૌહરની ૧૯૮૧ની જન્મ તારીખ આપેલી છે; એ જોતાં તો ૩૩ વરસની ગૌહર પાંચ વરસ વહેલી ‘ઓલ્ડ’ થઈ જશે! સોચો ઠાકુર.... સૉરી, સોચો કુશાલ!!