Tuesday, September 29, 2015

ફિલમની ચિલમ.... ૨૭ સપ્ટેમ્બર ૨૦૧૫



સિદ્ધાર્થ રાંદેરિયાની ‘ગુજ્જુભાઇ ધી ગ્રેટ’નું આગમન ગુજરાતી 

ફિલ્મોમાં ‘કોમેડી ફિલ્મ’ની એક નવી જ કેટેગરીનો પ્રારંભ છે


‘શ્રાદ્ધ’માં પિક્ચર રિલીઝ કરવા પોતાના ‘જઝ્બા’માં ‘શ્રદ્ધા’ જોઇએ! 
 

શું ઐશ્વર્યારાય અને અક્ષયકુમાર જેવા સ્ટાર્સ પણ ‘શ્રાદ્ધની બીક કરતાં પોતાની મહેનતમાં શ્રદ્ધા વધારે રાખો’ એવી રેશ્નાલિસ્ટ વિચારધારાને માનતા થઈ ગયા હશે? આ સવાલ થવાનું કારણ એ છે કે ઐશ્વર્યાના પુનરાગમનની ફિલ્મ ‘જઝ્બા’ બીજી ઓક્ટોબરે અને અક્ષયનું મોટું પિક્ચર ‘સિંગ ઇઝ બ્લિંગ’ ૯મી ઓક્ટોબરે એમ બન્ને શ્રાદ્ધ પક્ષમાં રિલીઝ થઈ રહી છે! ગયા વર્ષે આ કોલમમાં લખ્યું હતું એમ, હવે સિનેમાના ધંધામાં ‘સરાદીયાં’ કહીને જે સમયગાળાને વગોવીને તેમાં સારાં કામ કરવાનું ટાળવામાં આવે છે, તે પિરીયડની ધાક રહી નથી. સૌએ અનુભવ્યું છે કે ‘દશેરા’, ‘લાભપાંચમ’, ‘અખાત્રીજ’ કે ‘વસંત પંચમી’ જેવા ‘વગર જોયા મહુરતના’ કાયમી શુભ દિને રજૂ થયેલી ફિલ્મો પણ, તેમાં જો ભલીવાર ન હોય તો, ફ્લોપ જતી હોય છે. જેમ કે આ સાલ ગણેશોત્સવ જેવા શુભ સમયમાં, ૧૮મી સપ્ટેમ્બરે, આવેલી ‘કટ્ટી બટ્ટી’નો કદાચ આ સાલની ફ્લૉપ ફિલ્મોમાં સમાવેશ થશે!  
 



‘કટ્ટી બટ્ટી’ પોતાના ભાવ વધાર્યા પછીની કંગનાની પ્રથમ ફિલ્મ છે અને તેથી નિષ્ફળતા બદલ તેની હરીફ હીરોઇનો ઉપરાંત કેટલાક ‘હીરોલોગ’ પણ મનમાં મુસ્કુરાતા હશે. કેમ કે ‘ક્વિન’ અને ‘તનુ વેડ્સ મનુ રિટર્ન્સ’ના ૧૦૦ કરોડના બિઝનેસ પછી કંગનાએ પોતાને પણ સરખી ફી મળવી જોઇએ એવું જાહેરમાં કહ્યું હતું. તેને પગલે બોક્સ ઓફિસની રાણી તરીકે નવાજવા માટે કંગનાને ‘ક્વિન’ કહેવાનું ચલણ હજી શરૂ થયું જ હતું. ત્યાં આ ૩૫ કરોડની ફિલ્મ નુકશાનીનો તાકો સાબિત થવા તરફ આગળ વધી રહી છે. અગાઉ વિદ્યા બાલનને પણ ‘ફિમેલ બીગ બી’ કહેવામાં આવતી હતી, ત્યારે પણ હીરો-હીરોઇનના પેમેન્ટમાં કરોડોના તફાવતનો મુદ્દો ચર્ચામાં આવ્યો હતો. આ સાલ ફિલ્મ સ્ટાર્સના મહેનતાણાના આંકડા ‘ફોર્બસ’ મેગેઝીને પ્રસિદ્ધ કર્યા, ત્યારે આપણા ‘હીરો લોગ’ દુનિયાભરના ટોપ ટ્વેન્ટીમાં હતા અને હીરોઇનો? એ યાદી પ્રગટ થઈ, ત્યારે બે-ચાર કરોડ લેતી આપણી ટોચની એક્ટ્રેસો પણ વિશ્વની સરખામણીએ ક્યાંય નહતી! હીરોઇનોને પણ હીરો જેવા પૈસા આપવાના થાય તો બજેટ લેવલ કરવા સરવાળે એક્ટરોને પોતાની રકમમાં બાંધછોડ કરવાનો વારો આવે; એ સમજતા મોટા અભિનેતાઓમાં હવે પોતાની સાથે નવી કે ઓછી જાણીતી અભિનેત્રીઓને લેવાનો ટ્રેન્ડ ચાલ્યો છે. (‘સિંગ ઇઝ બ્લિંગ’માં એમી જેક્સન હીરોઇન છે!)

તેથી જ્યારે એવા ન્યૂઝ આવે કે ‘કટ્ટી બટ્ટી’ ભારતમાં પ્રથમ વીકમાં વીસેક કરોડની આસપાસ એકત્ર કરી શકશે. અથવા વિદેશોના ૭-૮ કરોડની શક્યતા સાથે બહુ જોર કરીને પણ તે આંકડો ત્રીસેક કરોડે પહોંચે તો ય તેના પર દાવ લગાવનારાઓને ખાતું સરભર કરવાની મુશ્કેલી તો રહેશે, ત્યારે તેને જરૂર કરતાં વધુ ચગાવવાની દાનત અમુક મીડિયાની રહેવાની. જ્યારે હકીકત એ છે કે ટોપ સ્ટાર ગણાતા અભિનેતાઓની ફિલ્મો પણ ક્યાં ફ્લોપ નથી જતી? એટલે જ ‘સુપરસ્ટાર’ કહેવાતા એક્ટરોની ફિલ્મોને સમાંતર નાના કલાકારો સાથે સસ્તા પડતરનાં પિક્ચરો પણ બની રહ્યાં છે. એવી એક અભિનેત્રી એટલે ‘બીગ બૉસ’થી અને વધારે તો એ શોમાં સલમાન ખાનની લાડકી તરીકે જાણીતી થયેલી ખુબસુરત વિદેશી અભિનેત્રી એલી એવરામ. તેની એક જ શુક્રવારે ૨૫મી સપ્ટેમ્બરે બે ફિલ્મો રજૂ થઈ રહી છે! તે પૈકીની ‘ભાગ જહોની’માં તેનો રોલ કેવડો હશે તેની માત્ર કલ્પના જ કરી શકાય. કેમ કે તેમાં ફિલ્મ સમારંભોમાં પોતાની આતશબાજીને કારણે જાણીતા મોરાનીબંધુઓ પૈકીના એકની પુત્રી ઝોઆ મોરાની હીરોઇન છે અને હીરો કુણાલ ખેમુ છે. પરંતુ, એલી એવરામ અબ્બાસ-મસ્તાને બનાવેલી  ‘કિસ કિસ કો પ્યાર કરું’ના પ્રમોશનમાં હીરો કપિલ શર્મા સાથે ઘણી જગ્યાએ દેખાઇ છે. આ લખાણ પ્રસિદ્ધ થતા સુધીમાં કપિલની એ ફિલ્મનું ભાવિ પણ નક્કી થઈ ચૂક્યું હશે અને સાથે સાથે તે ટીવી પર ‘કોમેડી નાઇટ્સ’ કરતો રહેશે કે નહીં એ પણ!

 
કપિલ માટે અત્યારે તો બેઉ હાથમાં લાડુ જ છે. પિક્ચર હીટ જાય તો ‘ફિલ્મસ્ટાર’ અને ના ચાલે તો ટેલીવિઝનના સુપરસ્ટાર કોમેડિયન તરીકે મજાક-મસ્તી કરતા કરતા બીજાઓની ફિલ્મોનું પ્રમોશન કરતા રહેવાનું! કપિલની એ ફિલ્મ પછીના જ અઠવાડિયે બીજી ઓક્ટોબરે અક્ષય કુમારની ‘કિંગ ઇઝ બ્લિંગ’ હોઇ  ‘કિસ કિસ કો પ્યાર કરું’ જેટલું જોર કરવાનું હશે તે પહેલા વીકમાં જ હશે. તેની સાથે બીજી ત્રણ ફિલ્મો અર્થાત ‘ભાગ જહોની’ ઉપરાંત ‘કેલેન્ડર ગર્લ્સ’ અને ‘ટાઇમ આઉટ’ પણ ૨૫ સપ્ટેમ્બર માટે લાઇન અપ થયેલી છે. તેથી અત્યારના સમયની સિસ્ટમ પ્રમાણે ‘રાત થોડી અને વેશ ઝાઝા’વાળો ખેલ થવાનો. પરંતુ, કપિલને પ્રમોશન દરમિયાન જે પ્રકારનો આવકાર મૉલ જેવી વિશાળ જગ્યાઓમાં પણ ભરચક ઓડિયન્સનો મળે છે, એ જોતાં ઇનિશ્યલ બિઝનેસ મેળવવા જેટલી તેની લોકપ્રિયતા તો દેખાય જ છે. બાકીનો આધાર, એઝ યુઝવલ, પિક્ચરમાં કેવો માલ ભર્યો છે તેના પર રહેવાનો.


‘કિસ કિસ કો પ્યાર કરું’ના દિગ્દર્શક આપણી ગુજરાતી બેલડી અબ્બાસ-મસ્તાન છે, જેમણે શાહરૂખને ‘બાઝીગર’, અક્ષય કુમારને ‘ખિલાડી’, સૈફ અલીખાનને ‘રેસ’ અને ‘રેસ ટુ’, આપી છે અને જેમણે ‘ઐતરાઝ’, ‘અજનબી’, ૩૬ ચાઇના ટાઉન’ અને ‘હમરાઝ’ જેવી અંગ્રેજી થ્રિલર પર આધારિત ઇન્ટરેસ્ટિંગ સ્ટોરીવાળી ફિલ્મો બનાવી છે. તેથી રસપ્રદ રજૂઆત તો હશે જ. આ જ જોડીએ ત્રીસ વરસ પહેલાં નરેશ કનોડિયા અને સ્નેહલતાને લઈને ગુજરાતી ફિલ્મો ‘સાજણ તારાં સંભારણાં’ અને ‘મોતી વેરાણાં ચોકમાં’ પણ બનાવી હતી એ કેટલાને યાદ હશે?

ગુજરાતીમાં એ ગ્રામ્ય પૃષ્ઠભૂમિની ફિલ્મોના એ દૌર પછી તાજેતરમાં અર્બન ફિલ્મોના ચમકારા આશિષ કક્કડની ‘બેટર હાફ’, અભિષેક જૈનની ‘કેવી રીતે જઈશ’ અને ‘બે યાર’થી દેખાવા લાગ્યા છે. એવા સમયમાં સિદ્ધાર્થ રાંદેરિયા જેવા હાસ્યના સિદ્ધહસ્ત કલાકારની ફિલ્મ ‘ગુજ્જુભાઇ ધી ગ્રેટ’નું આગમન ગુજરાતી ફિલ્મોમાં ‘કોમેડી ફિલ્મ’ની એક નવી જ કેટેગરીનો પ્રારંભ છે. ટ્રેઇલર જોતાં સિદ્ધાર્થભાઇના એક અત્યંત સફળ નાટક ‘ગુજ્જુભાઇએ ગામ ગજાવ્યું’નું ફિલ્મીકરણ જ લાગે છે. પણ જે સળંગ કોમેડી નાટકોમાં સખ્ખત ચાલે છે, તેને સિનેમામાં લાવવાનું યુવાન દિગ્દર્શક ઇશાન રાંદેરિયા અગાઉ કોઇને કેમ નહીં સૂઝ્યું હોય? હાસ્યના નામે  ગુજરાતીમાં એક જમાનામાં રમેશ મહેતાનો એક અલગ કોમેડી ટ્રેક ચલાવવાની પ્રથા હતી. જેમ હિન્દીમાં મહેમૂદ એમ ગુજરાતીમાં રમેશ મહેતા અનિવાર્ય અંગ હતા. પરંતુ, જેમ મહેમૂદે ‘પડોસન’ કે ‘પ્યાર કિયે જા’ જેવાં રમૂજી ચિત્રો બનાવ્યાં એવો આઉટ એન્ડ આઉટ કોમેડીનો પ્રયોગ ગુજરાતીમાં થયાનું સાંભરતું નથી. (ભૂલચૂક લેવી દેવી!) 

આજે ગ્લોબલાઇઝેશનને લીધે સ્થિતિ એવી છે કે ગુજરાતના ગામડાના પ્રેક્ષકને પણ ‘ગુજુભાઇ ધી ગ્રેટ’ એવા ઇંગ્લિશ નામનો વાંધો નથી હોતો. તેનો સૌથી મોટો પુરાવો એ છે કે હવે આવતી હોલીવુડ ફિલ્મોનાં નામ, અગાઉની જેમ, બદલવામાં આવતાં નથી. (યાદ છેને? જેમ્સ બોન્ડના ‘ગોલ્ડ ફિંગર’ની પબ્લિસિટી ‘સુનહરી હસીના કે કાતિલ નખરે’ તરીકે કરાતી?) અંગ્રેજી ટાઇટલની રીતે છેલ્લે ઇમ્તિયાઝ અલીનો ઉલ્લેખ જરૂરી છે. ઇમ્તિયાઝની રણબીર અને દીપિકાની નવી ફિલ્મ ‘તમાશા’નું મૂળનામ ‘વિન્ડો સીટ’ રાખ્યું હતું. તો ‘જબ વી મેટ’ને શરૂઆતથી ‘ટ્રેઇન’ ટાઇટલ અપાયું હતું અને સૈફ-દીપિકાની ‘લવ આજકલ’નું શૂટીંગ કયા નામ સાથે  થયું હતું, જાણો છો? ‘ઇલાસ્ટિક’!!  


તિખારો!

પ્રિયંકા ચોપ્રાની ટીવી સિરીઝ ‘ક્વોન્ટિકો’નાં પોસ્ટર્સ અમેરિકા-કેનેડામાં ઠેર ઠેર લાગ્યાં છે. તે જોઇને ગૌરવ અનુભવતી સની લિયોનિએ ‘ટ્વીટર’ પર પ્રિયંકાને અભિનંદન આપ્યા. સૌ જાણે છે એમ, સનીએ કેનેડાથી મુંબઈ આવીને હિન્દી સિનેમામાં એક આગવી જગ્યા બનાવી છે. એટલે પ્રિયંકાએ સામો જવાબ લખ્યો, “તેં મારા દેશમાં તારા દેશને સન્માન અપાવ્યું એ જ કામ મેં તારા દેશમાં કર્યું!!”


Monday, September 28, 2015

ફિલમની ચિલમ સપ્ટેમ્બર ૨૦, ૨૦૧૫


“એક્ટિંગ? યહાં એક્ટિંગ આતી કિસે હૈ? બારહ ફ્લોપ દોગે, તેરહવીં મેં હીટ હો જાઓગે...” 

 

નાના પાટેકર, પરેશ રાવલ, અનિલ કપૂર અને જહોન અબ્રાહમની કોમેડી ફિલ્મ ‘વેલકમ બેક’ બીજા વીકમાં ૧૫૦ કરોડ પ્લ્સના વિશ્વવ્યાપી કલેક્શનને પાર કરી ચૂકી હોવાના ગુડ ન્યુઝવાળા (અને તેમ છતાં તેના દિગ્દર્શક અનીસ બાઝમીને પોતાની ‘ફી’ના સાડા ચાર કરોડ પૈકીના બાકી રહેલા બે કરોડ નહીં મળ્યાની જાહેર ફરિયાદવાળા) આ સપ્તાહે ૧૧મીએ રિલીઝ થયેલી ‘હીરો’ને લીધે દર્શન જરીવાલાનો એક અમર સંવાદ યાદ આવી ગયો! ‘હીરો’માં સુનિલ શેટ્ટીની પુત્રી અતિયા અને ઝરિના વહાબ તથા આદિત્ય પંચોલીનો દીકરો સૂરજ ઇન્ટ્રોડ્યુસ કરાયાં તે પિક્ચરના રિવ્યુ વાંચતાં, આપણા સરસ ગુજરાતી એક્ટર દર્શન જરીવાલા, ફિલ્મ ઇન્ડસ્ટ્રી વિશેની એક ઇન્ટરેસ્ટિંગ ફિલ્મ ‘સુપરસ્ટાર’માં, બોલે છે એ ડાયલોગ યાદ આવી ગયો. એ પિક્ચરમાં દર્શન એક પ્રોડ્યુસર બન્યા હોય છે; જે પોતાના દીકરાને હીરો તરીકે લૉન્ચ કરવા માગતા હોય છે. પણ ‘રઈસ બાપકી બિગડી ઔલાદ’ જેવો દીકરો (મસ્ત એક્ટર કુણાલ ખેમુ!) અભિનેતા બનવાનો ઇન્કાર કરતાં ઇમાનદારીથી કારણ કહે છે કે પોતાને એક્ટિંગ આવડતી નથી. ત્યારે પપ્પા, એટલે કે દર્શનભાઇ, કહે છે, “એક્ટિંગ? યહાં એક્ટિંગ આતી કિસે હૈ? બારહ ફ્લોપ દોગે, તેરહવીં મેં હીટ હો જાઓગે...” આ અમર સંવાદ સ્ટાર-કિડ સંજયદત્ત જેવા કેટલાક કિસ્સાઓને લીધે કેવો વાસ્તવિક લાગે છે? 

સંજુબાબાની પહેલી ફિલ્મ ‘રૉકી’ કે તે દિવસોમાં આવેલી ‘વિધાતા’ વાચકોને યાદ હશે જ. તેમાં ક્યાંય માતા નરગીસ કે પિતા સુનિલદત્તના અભિનયની આછી ઝલક પણ ન હતી. પરંતુ, તે પછીનાં વરસોમાં અનુભવે મંજાયેલા સંજયનો ‘વાસ્તવ’ કે ‘મુન્નાભાઇ’ સિરીઝમાંનો અભિનય જુઓ તો કેટલો બધો ફરક લાગે! એટલે તાલીમ એ સૌ મારા-તમારા પૈસે લે. કેમ કે પબ્લિસિટી પાછળ વાપરેલા અઢળક રૂપિયાને લીધે સિનેમાના શોખીનો બિચારા ઉત્સુકતાથી થિયેટરો પર પહોંચી જાય. તેને લીધે  ટિકિટબારી પર વકરાનો વરસાદ નહીં તો ઝરમર અમીછાંટણાં થાય તો પણ ‘હીરો’ની જેમ રોકેલાં નાણાં પરત આવી જાય. (જેમ વકીલ કે ડોક્ટર અથવા નેતાનાં સંતાનો એમ જ ફિલ્મી સિતારાઓનાં બાળકો પણ ‘ક્ન્યાની કેડે ભાર’ મૂકીને જ સફળતાની સીડી ચઢતાં હોય છે. શરૂઆતનો એકાદ કેસ કે ઓપરેશન અથવા રાજવહીવટ ફેઇલ જાય તો પણ રડશે રૂવાળો... કપાસિયાવાળાને કોઇ ચિંતા નહીં!) ‘હીરો’ના કિસ્સામાં પહેલા ચાર-પાંચ દહાડામાં ૨૫ કરોડનો સાવરણો વાગી ગયો હોઇ પ્રોડ્યુસર તરીકે સલમાનને તો ૨૭ કરોડની પડતર કિંમતવાળી એ ફિલ્મ વીલોવીલ થઈ ગઈ. તેનો નફો રોકડમાં નહીં પણ સંબંધોમાં હશે. ફિલ્મ ઉદ્યોગમાં પરોપકારનાં કામોને લીધે એ ‘ભાઇ’ તરીકે ઓળખાય છે. તેમાં બે સ્ટાર્સનાં બાળકોને કામધંધે લગાડવાની ક્રેડિટ ઉમેરાશે.

સલમાને સ્પોન્સર કરેલાં સ્ટાર-કિડ્સ અતિયા અને સૂરજ અંગે મુશ્કેલી એ છે કે સુનિલ શેટ્ટી હોય કે આદિત્ય પંચોલી બેમાંથી કોઇ નરગીસ-સુનિલદત્તની કક્ષાના કલાકારો નથી. એટલે ‘કૂવામાં હોય તો હવાડામાં આવે’ એવી કહેવતના સંદર્ભે સૂરજને તો હજી પણ ઝરિના વહાબના ઝરણાનો સહારો હશે; પણ અતિયા (કે અતૈયા?)ને તો મોટેભાગે જાતમહેનત ઝિંદાબાદ કરવાની રહેશે. (દેખાવમાં તો એ ‘મહેનતુ’ જ લાગે છે!) અતિયાને જો કે સુનિલ શેટ્ટીની અભિનયની તાકાત કરતાં ફિલ્મ ઇન્ડસ્ટ્રીમાંની તેમની ગુડવીલનો સ્ટૉક વધારે કામ લાગવાનો છે અને તે આ અઠવાડિયે વહેતી થયેલી (કે કરાવાયેલી?) એક ન્યુઝ આઇટમથી પણ વધારે સમજાય છે. તે મુજબ તો કરણ જોહર પોતાની એક આગામી ફિલ્મ માટે અતિયાને લેવાનું વિચારી રહ્યા છે. તે ન્યુઝમાં મઝા એક જ છે: વિચારવામાં શું વાંધો હોય? એમ તો કરણ જોહર ‘રામ લખન’ને નવેસરથી બનાવવા માટે રિતિક રોશન અને અભિષેક બચ્ચનને લેવાનું ‘વિચારતા’ હોવાના અહેવાલો પણ આ અઠવાડિયે જ ક્યાં નથી આવ્યા? 


એ જ પિક્ચર માટે અગાઉ એવા રિપોર્ટ આવ્યા ત્યારે વરૂણ ધવન અને અર્જુન કપૂરનાં નામ સંભળાતાં હતાં. પછી અર્જુન કપૂરને ‘રામ’ અને રણવીરસિંગને ‘લખન’ બનાવાશે એવી ‘વિચારણા’ પણ ચાલતી હતી! એક તબક્કે રણબીર કપૂર અને સિદ્ધાર્થ મલ્હોત્રાની જોડી પણ ગોસીપના મેદાનમાં રમાડાતી હતી. (ચર્ચામાં રહેવા તમે સફળ નિર્માતા હો એટલું પૂરતું નથી હોતું... સાથે ગાજર લબડતું રાખવાની કળા પણ આવડતી હોય તો સૌ કોઇ તમારી સાથે કૉફી પીવા તૈયાર હોય અને રેપિડ ફાયર ઝીલવા પણ!) સલમાને પ્રોડ્યુસ કરેલા ‘હીરો’નો હશ્ર જોયા પછી ચિંતા એ થાય કે ‘રામ લખન’ની હાલત ‘હીરો’ જેવી તો નહીં થાય ને? મૂળ ‘હીરો’ની સુપરહીટ સફળતા માટે જેકી શ્રોફ અને મીનાક્ષી શેષાદ્રીની નહીં પણ સંગીતકાર લક્ષ્મીકાન્ત-પ્યારેલાલ અને આનંદ બક્ષીની જોડી જવાબદાર હતી. કર્ણપ્રિય સંગીત અને અર્થપૂર્ણ કવિતાઓ (લંબી જુદાઇ...) એ હીરો-હીરોઇન હતાં! આ સત્ય પહેલીવાર પ્રોડ્યુસર બનેલા સલમાનખાન જેવા અનુભવી સ્ટારને કેમ નહીં યાદ રહ્યું હોય? શું સુભાષ ઘઈએ પોતાની એ બ્રાન્ડનું રક્ષણ કરવાની, પ્રકાશ ઝાની જેમ, જરૂરત નહતી?


પ્રકાશ ઝાની સફળ ફિલ્મ ‘ગંગાજલ’નો બીજો ભાગ બનાવતી વખતે નેચરલી તેને ‘ગંગાજલ-ટુ’ કહેવાની ગણત્રી રાખી હશે. પરંતુ, આખું પિક્ચર શૂટ થઈને રજૂ થવાની તૈયારીઓ થવા માંડી છે, ત્યારે મૂળ ફિલ્મના અત્યારના રાઇટ ધરાવનારા મેદાનમાં આવ્યા અને એ ટાઇટલ વાપરવા સામે લિગલ નોટિસ મોકલી. એટલે પ્રકાશ ઝાએ હવે પિક્ચરનું નામ બદલીને ‘જય ગંગાજલ’ કર્યું છે. જો પ્રથમ ‘ગંગાજલ’માં અજય દેવગન પોલીસ અધિકારી બન્યા હતા, તો અહીં પ્રિયંકા ચોપ્રા આઇપીએસ ઓફિસર બની છે. તેથી ચિંતા એ થાય કે પેલી નોટિસમાં શું વાંધો માત્ર ટાઇટલ અંગેનો હશે કે પછી તેમાંની વાર્તાનો પણ હશે? તેનાથી પણ મોટો ભય એ વાતનો પણ છે કે પિક્ચરમાં વિલનની ભૂમિકા ખુદ પ્રકાશ ઝાએ નિભાવી છે. શું એ એવી જમાવટ કરી શકશે? એ રીતે પડદા પાછળથી કેમેરાની સામે આવવાની ભૂલ છેલ્લે મુઝફરઅલીએ ‘જાનિસાર’માં કરી હતી. તે ફિલ્મ મહિના પહેલાં ૭મી ઓગસ્ટે આવી ’ને ક્યારે તેનો નિકાલ થઈ ગયો એ પણ કોઇને ખબર ના પડી. એટલે ‘જિસ કા કામ ઉસી કો સાજે, ઔર કરે તો બુધ્ધુ બાજે’ સમજતા ‘યશરાજ’વાળા આદિત્ય ચોપ્રા કદી સ્ક્રિન પર ક્યાં આવે છે? ઇવન પોતાની પત્ની પ્રેગ્નન્ટ હોય (યસ, રાની મુકરજીને સારા દિવસો જાય છે!) અને તે ‘બેબી બમ્પ’ બતાવતી જાહેર સમારંભોમાં દેખાય તો પણ નહીં... ટીવીના પડદે તો નહીં.... છાપાના પાને પણ નહીં!! 

 

તિખારો!

રજત શર્મા પણ સારી કટ મારી શકે છે... અને તે પણ કપિલ શર્મા જેવા કોમેડીના સુપરસ્ટારને! તેમની ‘આપકી અદાલત’માં પોતાના પિક્ચર ‘કિસ કિસ કો પ્યાર કરું’ના પ્રમોશન માટે આવેલા કપિલવાળા એપિસોડના ટિઝર ‘ઇન્ડિયા ટીવી’ પર ચાલે છે. (ફાઇનલ એપિસોડમાં આ રમૂજ રહેશે કે પછી એડિટ થઈ જશે?) તેમાં રજતજી કપિલને પૂછે છે, “આપ ઔર મનમોહનસિંગજી એક હી કોલેજ મેં પઢે હૈં, ના?” કપિલ કહે, “હા”. એટલે રજત શર્માની સ્ક્વેર કટ, “તો ફિર ઐસા ક્યા ફર્ક પઢાઇ મેં થા કિ આપ તો ઇતના બોલતે હૈં ઔર વો......”!!

 











Saturday, September 12, 2015

ફિલમની ચિલમ.... ૧૩ સપ્ટેમ્બર ૨૦૧૫





રાગિની બનકે હવાઓં મેં બિખર જાઉંગા,
 અબ નઈ તર્જ, નયા ગીત ગુનગુનાઉંગા!


 આદેશ શ્રીવાસ્તવના રૂપમાં કેન્સરે એક યુવાન કલાકારને આપણી વચ્ચેથી છીનવી લીધા અને જે રીતે તેમની અંતિમ ક્રિયામાં અને પ્રાર્થનાસભામાં ફિલ્મ ઉદ્યોગના સૌ જોડાયા તે જોતાં એક મ્યુઝિક ડીરેક્ટરને શોભે એવી એ વિદાય હતી. તેમના એ માઠા પ્રસંગે શાન, સુચિત્રા કૃષ્ણમૂર્તિ, અનુપ જલોટા જેવા સંગીતના કલાકારોથી લઈને અમિતાભ બચ્ચન, ઐશ્વર્યારાયથી માંડીને માધુરી દીક્ષિત અને જીતેન્દ્ર સુધીના સૌ સ્ટાર્સ પણ હાજર હતા. રેલ્વેમાં સુપ્રિન્ટેન્ડેન્ટ પિતા અને અધ્યાપક માતાના સંતાન અને કોઇ પારિવારિક કનેક્શન વગર માત્ર પોતાના હુન્નરને સહારે સંગીતના આકાશમાં ચમકવા જબલપુરથી મુંબઈ આવેલા આર્ટિસ્ટ માટે એ એક મોટી ઉપલબ્ધિ હતી. સ્કૂલમાં ભણતા ત્યારથી જ ડ્રમ જેવા તાલવાદ્યને વગાડનાર આદેશનો હાથ તેના પર એવો સરસ બેસી ગયો હતો કે બહુ નાની ઉંમરે જ એ જબલપુરની એક મ્યુઝિક ઓર્કેસ્ટ્રાના એ ‘સ્ટાર’ બની ચૂક્યા હતા. તેમના તે દિવસોના મિત્રો પણ જાણતા હતા કે તેમના જેવી ટેલેન્ટ માટે જબલપુર નાનું પડે એવું હતું. મુંબઈ અને ત્યાંની ફિલ્મી મ્યુઝિકની દુનિયા જ તેમને ન્યાય આપી શકશે એમ સમજતા આદેશ સાવ નાની વયે આવી પહોંચ્યા મુંબઈ!

 
પણ મુંબઈમાં અને તે પણ ફિલ્મી દુનિયામાં કોઇ પ્રકારના વ્યવસ્થિત કનેક્શન વગર કોઇપણ વ્યવસાયમાં એન્ટ્રી મેળવવી ક્યાં સહેલી હોય છે? સ્ટ્રગલના એ દિવસોમાં તે ફ્રીલાન્સ ડ્રમર હતા અને કોઇપણ સંગીતકારને ડ્રમ પ્લેયરની આવશ્યકતા હોય ત્યારે આદેશને કામ મળતું. આ એ સમય હતો, જ્યારે ફિલ્મી ગીતોમાં હજી ભારતીય સંગીતનું પ્રાધાન્ય રહેતું અને તેથી ડ્રમ જેવા પાશ્ચાત્ય વાદ્ય માટે આજના જેવી ડિમાન્ડ નહતી. પરંતુ, થોડા સમયમાં એ ‘બેસ્ટ ડ્રમર’ કહેવાતા થયા અને ધીમે ધીમે સંગીતકારોની નજીક આવ્યા. તેમાંના એક હતા, જતિન-લલિત, જેમનો પંડિત પરિવાર સંગીતથી ભરપુર હતો. ત્યાં જ થયો વિજયેતા સાથે પરિચય. વિજયેતા તે દિવસોમાં ૧૯૮૬માં દિગ્દર્શક સમીર મલ્કાન સાથે કરેલાં લગ્ન પછી સાવ ટૂંકા સમયમાં છુટાછેડા લીધેલી યુવતી હતી. ’૯૦માં આદેશ અને વિજયેતાનાં મેરેજ થયાં. તે જ વર્ષે તેમને માધુરી દીક્ષિતની ફિલ્મ ‘સૈલાબ’માં બેકગ્રાઉન્ડ મ્યુઝિક આપવાની તક મળી અને લાગ્યું કે તેમના જીવનમાં વિજયેતાની એન્ટ્રી તેમના માટે નસીબદાર સાબિત થઈ રહી છે.

‘સૈલાબ’થી શરૂઆત કર્યા છતાં સ્વતંત્ર સંગીતકાર તરીકેની શરૂઆત તો ત્રણ વરસ પછી ૧૯૯૩માં ‘કન્યાદાન’ મળી ત્યારે થઈ. (તે અગાઉ ’૯૧માં ‘ખતરા’ ફિલ્મ મળી હતી ખરી. પણ તે કદાચ બની નહીં.) તેને આદેશ શ્રીવાસ્તવની મ્યુઝિક ઇન્ડસ્ટ્રીમાં ઉભી થયેલી ગુડવીલ જ કહી શકાય કે લતા મંગેશકર પણ ‘કન્યાદાન’નાં એક પ્લેબેક સિંગર હતાં. પણ કમનસીબે એ પિક્ચર રિલીઝ જ ના થયું. તેના પછીના ‘જાને તમન્ના’ની પણ એ જ હાલત થઈ. સ્ટ્રગલના કેવા કેવા પ્રકાર હોઇ શકે છે! પણ ૧૯૯૪માં આવેલા ‘આઓ પ્યાર કરેં’થી સૌને આ સંગીતકારની નોંધ લેવી પડી. તેમાંનાં સૈફ અલીખાન અને શિલ્પા શેટ્ટી ઉપર ફિલ્માવાયેલાં બે ગીતો “હાથોં મેં જો આ ગયા રુમાલ આપકા...” અને “ચાંદ સે પર્દા કીજિયે કહીં ચુરા ન લે ચેહરે કા નૂર...” તેમની રિધમને લીધે ખાસ્સાં પોપ્યુલર થયાં હતાં. પછીની તેમની કરિયરમાં તો ‘બાગબાન’ના ‘ચલી ચલી ફિર ચલી ચલી’ અને ‘કભી ખુશી કભી ગમ’ના ‘શાવા શાવા’ જેવાં નાચવા-ઝૂમવાનાં ગાયનો તો આવ્યાં જ; સાથે સાથે ‘રાજનીતિ’ના “મોરા પિયા બોલત નાહીં...” જેવાં ક્લાસિકલ ટચવાળાં તેમજ ‘ચલતે ચલતે’ના “સુનો ના સુનો ના, સુન લો ના...”  જેવાં કર્ણપ્રિય ગીત પણ આવ્યાં.



પરંતુ, એ જ કરિયરમાં ‘હમ કો દીવાના કર ગયે’ ગાયન પણ હતું. ૨૦૦૬માં ‘ટાઇમ્સ ઓફ ઇન્ડિયા’ને આપેલા એક ઇન્ટર્વ્યૂમાં આદેશજીએ એમ કહ્યું હતું કે એ કમ્પોઝીશન અનુ મલિકનું નહીં પણ તેમનું હતું! એટલું જ નહીં, ટાઇટલના એ શબ્દો પણ ગીતકાર સમીરના નહીં આનંદ બક્ષીના હતા. કાનૂની કાર્યવાહી કરવાની તેમણે વાત કરી હતી. પછી એ મામલો કોઇક રીતે સુલઝ્યો જ હશે. કેમ કે અનુ મલિક અને સમીર બન્ને આદેશજીની પ્રાર્થના સભામાં આવ્યા હતા. એવો કોઇ ઉકેલ કદાચ કુમાર ગૌરવે કરવાનો બાકી હશે. કુમારની પ્રથમ ફિલ્મ ‘લવ સ્ટોરી’ની હીરોઇન વિજયેતાના પતિનું અવસાન થયું હોવા છતાં કુમાર ગૌરવ આશ્ચર્યજનક રીતે આ માઠા પ્રસંગે દેખાયા હોવાના કોઇ અહેવાલ નથી.
 


આમ જુઓ તો વિજયેતા અને આદેશ શ્રીવાસ્તવને એવો આઘાત તેમને કેન્સરની જાણ પહેલી વાર ૨૦૧૦માં થઈ ત્યારે જ લાગ્યો હતો. તે દિવસોમાં એટલે કે ૨૦૧૧માં એક હિન્દી પત્રકારને આપેલા ઇન્ટર્વ્યૂમાં આદેશે આ શબ્દો કહ્યા હતા, “એકદમ સે બીમાર પડના બહુત કષ્ટ ભરા હૈ. જિન લોગોં કે સાથ મૈંને બરસોં કામ કિયા ઉનકે ઠંડે રુખને મુઝે બીમારી સે જ્યાદા તકલીફ પહુંચાઇ હૈ. જબ મૈં બીમાર હુઆ તો કોઇ મુઝ સે મિલને નહીં આયા.” છેવટના દિવસોમાં લાખો રૂપિયાની કિંમતનાં ઇન્જેક્શનો અને દવાઓ લાવવાનાં થતાં. ત્યારે નૈતિક સહારો (મોરલ સપોર્ટ) આપવા વિજયેતા અને આદેશ શ્રીવાસ્તવનું મિત્રોનું એક અલગ જ ગ્રુપ સતત સાથે રહ્યું હતું. તેમાં પૂનમ ધિલ્લોન, આયેશા ઝુલ્કા, અલકા યાજ્ઞિક અને સુનિધિ ચૌહાણ એ મહિલાઓ તો હતી જ; સાથે સાથે તેમાં એક એવું નામ પણ હતું જેને આજે લોકો કદાચ વિસરી ગયા છે. એ હતા ‘માસુમ’ જેવી સેન્સિટીવ ફિલ્મના ડાયરેક્ટર શેખર કપૂર! નવાઇ લાગશે પણ આદેશજી તેમના બીમારીના દિવસોમાં શેખરના હાથે જ જમતા હતા અને તેથી રોજ સાંજે/રાત્રે શેખર અચૂક હોસ્પિટલમાં આવતા અને આદેશને જમાડતા!


આદેશને અપાયેલી શ્રદ્ધાંજલિઓમાં તેમના સાર્વજનિક કામનો ખાસ ઉલ્લેખ ન દેખાયો. બાકી ૨૦૧૩માં ઉત્તરાખંડના ભયાનક પુર વખતે તેમના કવિ મિત્ર આલોક શ્રીવાસ્તવને દિલ્હી ફોન કરીને તાત્કાલિક એક ગીત લખવા કહ્યું અને તાત્કાલિક તેને ગાયક શાન સાથે મળીને પોતે ગાયું. એ ગીત “ન જીવન બચા, ન જીવન કી નિશાની, પહાડોં પે બરસા પહાડોં કા પાની...” ચેનલો પર ચાલ્યું અને રાહત ભંડોળમાં નાણાં છલકાવવામાં મદદરૂપ થયા. તો એ અગાઉ નાની બાળકીઓ પર થતા બળાત્કાર અંગે જાગૃતિ લાવવા એ જ કવિ પાસે કવિતા લખાવી અને તેને માસુમ ગાયિકા અર્પણા પંડિત પાસે ગવડાવી. એ કવિતા, “નજર આતા હૈ ડર હી ડર અમ્મા, નહીં આના મુઝે ઇતને બુરે સંસાર મેં...” ને ‘આજતક’ ચેનલે દિવસો સુધી ચલાવી હતી. પરંતુ એક વાત ખટકી. આદેશ શ્રીવાસ્તવના પણ સંગીતવાળી ફિલ્મ ‘વૅલકમ બૅક’ તેમના અવસાનના દિવસોમાં જ રિલીઝ થઈ હતી અને તે પિક્ચરનો એકાદ શો પણ બંધ રહ્યાના રિપોર્ટ જોવામાં આવ્યા નથી. નો ડાઉટ, તેમને શ્રધ્ધાંજલિ બધાએ આપી. પરંતુ, અમને સ્પર્શી ગઈ આદેશના મિત્ર કવિ આલોક શ્રીવાસ્તવની શ્રદ્ધાંજલિની આ પંક્તિઓ.... “રાગિની બનકે હવાઓં મેં બિખર જાઉંગા, અબ નઈ તર્જ, નયા ગીત ગુનગુનાઉંગા!”