રાજેશ ખન્નાનો રેકોર્ડેડ સંદેશો...

બાતેં કરો મુઝ સે...!

રાજેશ ખન્નાની પ્રાર્થનાસભામાં ‘આનંદ’ની માફક તેમના પોતાના અવાજમાં રેકોર્ડ કરેલો સંદેશો સંભળાવવામાં આવ્યો હતો. 
 
અહીં છેલ્લે એ ઓડિયો રેકોર્ડીંગ એક દસ્તાવેજ તરીકે મૂક્યું છે.

તેમાંનો અવાજ સાંભળતાં એ સ્પષ્ટ લાગે છે કે આ રેકોર્ડીંગ તેમના અંતિમ દિવસોનું નથી. કેમ કે છેલ્લા દિવસોમાં ‘કાકા’નો અવાજ અત્યંત નબળો પડી ગયો હતો. શક્ય છે કે આ અગાઉના કોઇ ફંકશનનું પણ રેકોર્ડીંગ હોય અથવા પોતાની બિમારીની ગંભીરતા જાણ્યા પછી તેમણે જાતે આવી ‘આનંદ’ પ્રકારની વિદાય લેવાનું નક્કી કર્યું હોય.

જે હોય તે, પણ તેમાંથી તેમની એક્ટર બનવાની પ્રક્રિયાનું બયાન સાંભળવા મળે છે.

યુનાઇટેડ પ્રોડ્યુસર્સ સમક્ષ તેમણે “હાં, મૈં કલાકાર હૂં..”નો જે લાંબો સંવાદ ભજવી બતાવ્યો હતો અને જેને કારણે તે એ ટેલેન્ટ કોન્ટેસ્ટના વિજેતા  થયા એ પણ રસપ્રદ છે.

આ બ્લોગને લાગે વળગે છે ત્યાં સુધી તેમણે પહેલા નાટકમાં મળેલા એક માત્ર સંવાદ “ હુઝૂર સાહબ ઘર પે નહીં હૈ” ને બોલવામાં પણ ઉલટ સુલટ કરીને જે લોસ્મોચો માર્યાની ઘટનાનો ઉલ્લેખ ‘અગર તુમ ન હોતે’ શિર્ષક હેઠળના ૧૯જુલાઇના રોજ મૂકેલા લેખમાં કર્યો છે, તે ઘટના પણ રેકોર્ડીંગમાં સંભળાય છે. તેમાં આપણે ક્વોટ કરેલા વાક્યને બદલે શબ્દો અલગ  છે. પરંતુ, રાજેશ ખન્નાનું કહેવાનું તો એ જ છે કે બોલતી વખતે તેમનાથી શબ્દો ઉલટ સુલટ થઇ ગયા હતા.

તેથી આજે જ્યારે એ જ ઘટના ખુદ ‘કાકાજી’ના અવાજમાં ઉપલબ્ધ છે, ત્યારે “ખબરદાર નંબરદાર...”વાળું તેમનું જ વાક્ય  ઓથેન્ટિક ગણાય. તેથી એ મૂળ લેખમાં પણ જરૂરી સુધારો કરી દીધો છે.

આ ઓડિયો જ્યારે પણ અને જે સંજોગોમાં પણ ધ્વનિમુદ્રિત થયો હશે, રાજેશ ખન્નાએ તેમના ચાહકોનો આભાર માનીને મનનો ભાર હળવો કરેલો સ્પષ્ટ સાંભળી શકાય છે....  નીચેના ફોટા ઉપર ક્લીક કરીને ખાત્રી કરવા જેવી છે!




તા.ક.
ફેસબુક ઉપર મેસેજ લખીને મિત્ર અભિજીત વ્યાસે નીચે મુજબની માહિતી નાટ્યલેખક પ્રવીણ સોલંકીના હવાલાથી ‘મુંબઈ સમાચાર’માં પ્રસિધ્ધ થયાનું જણાવ્યું છે.
તેનાથી આ ઓડિયો મૂકતી વખતે જે શક્યતા કહી છે (તેમાંનો અવાજ સાંભળતાં એ સ્પષ્ટ લાગે છે કે આ રેકોર્ડીંગ તેમના અંતિમ દિવસોનું નથી. કેમ કે છેલ્લા દિવસોમાં ‘કાકા’નો અવાજ અત્યંત નબળો પડી ગયો હતો...)
હવે જ્યારે એ બહાર આવી રહ્યું છે કે તે રેકોર્ડીંગ ૨૦૦૫માં એક ગુજરાતી કવિતા સંગ્રહના વિમોચન પ્રસંગે ‘કાકા’એ કરેલા ભાષણનું છે, ત્યારે એ પણ અહીં ‘તા.ક.’માં મૂકવું જરૂરી છે.

મુંબઈઃ રાજેશ ખન્નાની વિદાય બાદ શરૂ થયેલો પહેલો વિવાદ શમે ત્યાં જ ફરી બીજો વિવાદ ચગી ઉઠ્યો છે. ‘આશીર્વાદ’ બાદ હવે ચર્ચામાં છે કાકાના ચૌથામાં રાજેશ ખન્નાના ‘આખરી પૈગામ’ તરીકે સંભળાવવામાં આવેલી ટૅપ. સાત વર્ષ પહેલા ગુજરાતી કલાકારના કવિતાસંગ્રહના વિમોચન પ્રસંગે રાજેશ ખન્નાએ આપેલી સ્પીચને જ એડિટ કરીને પ્રચાર-પ્રસાર માધ્યમોએ ‘આખરી પૈગામ’ તરીકે પ્રસિદ્ધ કરી હોવાનો દાવો કરવામાં આવ્યો છે. ૧૮મી જૂન, ૨૦૦૫ના રોજ અંધેરીના ભવન્સ કલ્ચરલ સેન્ટર ખાતે યોજાયેલા કાર્યક્રમમાં રાજેશ ખન્ના મુખ્ય અતિથિ તરીકે આવ્યા હતા. નાટક અને ફિલ્મોના કલાકાર અમૃત પટેલનો કવિતાસંગ્રહ ‘મને એવું થાય છે’નું વિમોચન કર્યા બાદ રાજેશ ખન્નાએ આશરે ૩૫ મિનિટનું પ્રવચન આપ્યું હતું. ‘હું, અમૃત પટેલ, રાજેશ ખન્ના વગેરે રંગભૂમિને કારણે એકબીજાથી સુપરિચિત હતા. અમૃતભાઈના કવિતાસંગ્રહનું વિમોચન અમે રાજેશ ખન્નાના હાથે કરાવવાનું નક્કી કર્યું હતું. લલિત શાહના સહકારથી યોજાયેલા આ કાર્યક્રમમાં પ્રખ્યાત દિગ્દર્શક અબ્બાસ મસ્તાન પણ ઉપસ્થિત હતા. તાજેતરમાં જ રાજેશ ખન્નાના નિધન બાદ એ કાર્યક્રમની ઓડિયો, વિડિયો કે ફોટોગ્રાફ્સ વગેરે મેળવી શકાય કે? એમના ‘ચૌથા’માં ઉપયોગમાં લેવાની છે, એવો અબ્બાસભાઈનો ફોન આવ્યો.
ખૂબ જહેમત બાદ લલિત શાહે એ ઓડિયો કેસેટ્સ શોધી કાઢી અને માનવતાને ધોરણે મેં એ અબ્બાસભાઈને મોકલી આપી,’ એવું નાટ્ય લેખક પ્રવીણ સોલંકીએ ‘મુંબઈ સમાચાર’ને જણાવ્યું હતું.